نفرت کے خاتمے کے لیے رابطہ کی کوششوں کے اعتراف میں امریکی کانگریس کی جانب سے سیکرٹری جنرل رابطہ عالم اسلامی کے لئے اعزاز

واشنگٹن:
نفرت کے خاتمے اور مذہبی برادریوں کے مابین بقائے باہمی کے فروغ کے لیے رابطہ عالم اسلامی کی کوششوں کو سراہتے ہوئے، امریکی کانگریس کے ریپبلکن اور ڈیموکریٹ اراکین نے امریکی دارالحکومت واشنگٹن میں "کیپیٹل ہل"  کی عمارت میں سیکرٹری جنرل رابطہ عالم اسلامی اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی کو خصوصی اعزاز سے نوازا۔

ایوانِ نمائندگان اور سینیٹ کے متعدد اراکین نے اس اعزازی سند پر دستخط کیے، جس میں رابطہ کی ان کوششوں کو گراں قدر قرار دیا گیا جنہوں نے سماجی تنوع  کو مضبوط بنانے اور اسے تصادم و انتشار سے بچانے میں کلیدی کردار ادا کیا۔ بالخصوص ان بین الاقوامی کوششوں کی تعریف کی گئی جن کا محور ان نسل پرستانہ رویوں کا مقابلہ کرنا ہے جو مختلف مذاہب اور نسلوں سے تعلق رکھنے والے افراد کی سلامتی اور وقار کو نشانہ بناتے ہیں۔

تقریب میں شریک مسلم کمیونٹی کے قائدین نے اس اعزاز کو امریکہ میں مقیم تمام مسلمانوں کے لیے ایک اعزاز قرار دیتے ہوئے کہا کہ کیپیٹل ہل کی عمارت میں منعقد ہونے والا یہ اپنی نوعیت کا پہلا اور تاریخی واقعہ ہے۔

اس موقع پر گفتگو کرتے ہوئے عزت مآب شیخ ڈاکٹر محمد بن عبد الکریم العیسی نے کہا کہ یہ اعزاز دراصل ہماری ان اسلامی اقدار کی عکاسی کرتا ہے جو عالمی امن اور معاشروں میں ہم آہنگی کی داعی ہیں۔ انہوں نے اس بات پر زور دیا کہ رابطہ عالم اسلامی تمام فریقوں کے درمیان مثبت اور موثر مکالمے کو فروغ دینے کے لیے مسلسل کام کر رہی ہے تاکہ مفاہمت، شعور اور تعاون کی ثقافت کو تقویت مل سکے۔ ڈاکٹر العیسی نے مزید کہا کہ ہمارا یہ کام  دنیامیں پائے جانے والے ناگزیر تنوع کے حوالے سے خالقِ کائنات کی حکمت کے ادراک پر مبنی ہے، جس کا تقاضا ہے کہ تمام فریقوں کے درمیان پائے جانے والے اختلافات کو تصادم کے بجائے باشعور اور مہذب انداز میں سمجھا اور برتا جائے۔

تقریب کے دوران امریکی کانگریس کے اراکین نے اپنے خطاب میں رابطہ عالم اسلامی کی ان نمایاں کوششوں کو اجاگر کیا جو اس اعزاز کی بنیاد بنیں۔