اسلامی تعاون تنظیم کی خبر رساں ایجنسیوں کے اتحاد (یونا) کی جانب سے ”اسلامی مکاتب فکر کے درمیان پل قائم کرنے کے چارٹر“ کو بھرپور خراجِ تحسین

اسلامی تعاون تنظیم کی خبر رساں ایجنسیوں کے اتحاد (یونا) کی جانب سے ”اسلامی مکاتب فکر کے درمیان پل قائم کرنے کے  چارٹر“ کو بھرپور خراجِ تحسین

جدہ:
اسلامی تعاون تنظیم (OIC) کی خبر رساں ایجنسیوں کے اتحاد (یونا) نے جدہ میں منعقدہ ایک رمضانی تقریب کے دوران” اسلامی مکاتب فکر کے درمیان پل قائم کرنے کے  چارٹر“کو بھرپور خراجِ تحسین پیش کیا۔ اس نشست میں ممتاز علماء، مفکرین، عرب واسلامی خبر رساں ایجنسیوں کے نمائندوں اور بڑے میڈیا اداروں کے سربراہان نے شرکت کی۔

تقریب کے آغاز میں سیکرٹری جنرل رابطہ عالم اسلامی اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس تاریخی چارٹر پر علمائے کرام کے غیر معمولی اتفاقِ رائے  کا تذکرہ کیا۔ انہوں نے واضح کیا کہ یہ چارٹر رمضان 1445ھ میں منعقدہ تاسیسی کانفرنس میں جاری کیا گیا تھا، جسے خادمِ حرمین شریفین شاہ سلمان بن عبدالعزیز آل سعود (حفظہ اللہ) کی  سرپرستی حاصل تھی اور جس میں مختلف اسلامی مکاتبِ فکر سے تعلق رکھنے والے مفتیانِ کرام اور اکابر علماء شریک ہوئے۔

ڈاکٹر العیسی نے اس موقع پر  (یونا) کی جانب سے اس منفرد اعزازی تقریب کے انعقاد کو سراہا اور شرکاء کے علمی، فکری اور صحافتی تنوع کی تعریف کی۔

اس موقع پر 'یونا' کے ڈائریکٹر جنرل، جناب محمد الیامی نے اپنے خطاب میں کہا کہ یہ تقریب اس تاریخی دستاویز کو خراجِ تحسین پیش کرنے کے لیے منعقد کی گئی ہے جس پر علمائے امت نے مکہ مکرمہ میں اپنی قبلۂ جامع کے سائے میں دستخط کیے تھے۔ یہ دستاویز داخلی اسلامی مسائل، بالخصوص مسلکی تنوع کے حوالے سے ایک ذمہ دار ابلاغی بیانیے کی تشکیل کے لیے ایک مکمل 'روڈ میپ' فراہم کرتی ہے۔

جناب الیامی نے مزید کہا کہ تقریب میں شرکاء کی بڑی تعداد اس چارٹر کے گراں قدر مندرجات کی عکاسی کرتی ہے، انہوں نے اسے اسلامی میڈیا کے لیے ایک مرجع قرار دیا، جو ایسا جامع خطاب تشکیل دیتا ہے جو یکجہتی کو فروغ دیتا ہے، مشترکات کو نمایاں کرتا ہے، کلمہ کو جمع کرتا ہے، اسلامی وحدت کو تقویت دیتا ہے، اور امت کے مختلف طبقات کے درمیان اعتدال اور تقارب کی اقدار کو مستحکم کرتا ہے۔

اس رمضانی نشست کے دوران کتاب ”میثاق مکہ مکرمہ: دنیا کے لیے میانہ روی اور رواداری کا پیغام۔ براعظموں میں عالمی موجودگی اور تہذیبی اثرات“ کی رونمائی بھی کی گئی، نیز فلسطینی خبر رساں ایجنسی 'وفا' کو اس کی پیشہ ورانہ صحافتی خدمات پر خصوصی ایوارڈ سے نوازا گیا۔