اسلامی دینی قیادت کے ساتھ اپنی نوعیت کی پہلی ملاقات: برطانوی پارلیمنٹ کے اسپیکر اور اعلیٰ قیادت کا سیکرٹری جنرل رابطہ عالم اسلامی کا خیر مقدم

اسلامی دینی قیادت کے ساتھ اپنی نوعیت کی پہلی ملاقات:

برطانوی پارلیمنٹ کے اسپیکر اور اعلیٰ قیادت کا سیکرٹری جنرل رابطہ عالم اسلامی  کا خیر مقدم

لندن:
رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے لندن میں برطانوی پارلیمنٹ کے اسپیکر، معزز سر لنڈسی ہوئل سے ان کے دفتر میں ملاقات کی۔
ملاقات میں مذہبی اور نسلی طور پر متنوع معاشروں میں سماجی اتحاد کے بنیادی اصولوں پر گفتگو ہوئی، جن میں سب سے اہم باہمی احترام اور قومی ہم آہنگی کو درپیش خطرات کے انسداد کے لیے مؤثر قانون سازی کا پہلو نمایاں تھا۔ خاص طور پر اُن عناصر کا سدباب جن میں نفرت انگیز تقاریر، امتیازی سلوک، اور علیحدگی پر مبنی رویے شامل ہیں، جو قومی یکجہتی اور حب الوطنی کے جذبے کو کمزور کرتے ہیں، بالخصوص جب یہ متنوع معاشروں میں بعض بااثر اداروں کی جانب سے سامنے آئیں۔
اس موقع پر، اقوامِ متحدہ کے ہیڈکوارٹر (نیویارک) میں پیش کیے گئے رابطہ عالم اسلامی کے عالمی اقدام ”مشرق و مغرب کے درمیان تعاون اور تفاہم کے پل“ پر بھی تبادلہ خیال کیا گیا، جس میں عالمی تنظیموں، فکری اداروں، اعلیٰ سرکاری، پارلیمانی اور مذہبی قیادتوں نے شرکت کی تھی۔
شیخ العیسی نے اس بات پر زور دیا کہ برطانیہ کے مسلمان دینی اور قومی سطح پر بہت باشعور اور قانون پسند شہری ہیں، اور اگر کہیں کچھ الگ تھلگ آوازیں موجود بھی ہوں تو ان کا حال دنیا بھر میں اُن کے ہم منصبوں جیسا ہے، وہ صرف اپنی نمائندگی کرتے ہیں، اسلام کی نہیں۔ اسلامی اقدار وہی ہیں جو برطانوی مسلمانوں کی اکثریت کو تشکیل دیتی ہیں،جن میں اپنے وطن اور اس کے نظام سے وفاداری، قوانین کا احترام، اور متنوع معاشرتی اقدار کے ساتھ فخر شامل ہے۔
ملاقات کے بعد، اسپیکر برطانوی پارلیمنٹ نے عزت مآب سیکرٹری جنرل کو پارلیمان کے مختلف حصوں کا خصوصی دورہ کرایا۔
اسی سلسلے میں، برطانوی پارلیمنٹ کی  مرکزی اجلاس گاہ میں رابطہ عالم اسلامی کے سیکرٹری جنرل  اور چیئرمین مسلم علماء کونسل عزت مآب شیخ ڈاکٹر محمد بن عبد الکریم العیسی کے اعزاز میں ایک خصوصی نشست کا اہتمام کیا گیا، جس میں اسپیکر سمیت متعدد معزز اراکینِ پارلیمان شریک ہوئے۔
نشست کے دوران برطانوی معاشرے کے مختلف طبقات کے مابین انضمام، ہم آہنگی، اور شدت پسندی و نفرت انگیزی کے انسداد پر تفصیلی گفتگو ہوئی۔ اس کے ساتھ ساتھ رابطہ عالم اسلامی کی جانب سے تہذیبوں اور اقوام کے مابین مکالمے اور پرامن بقائے باہمی کے فروغ کے عالمی اقدامات کو بھی سراہا گیا۔