انڈونیشیا کے صدر کی جانب سے رابطہ عالم اسلامی کے سیکرٹری جنرل کا استقبال

جکارتہ:

جمہوریہ انڈونیشیا کے صدر،  جناب پروبوو سوبیانتونے دارالحکومت جکارتہ کے صدارتی محل میں رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی کا خیر مقدم کیا۔

ملاقات کے دوران  صدرِ انڈونیشیا نے رابطہ عالم اسلامی کے عالمی مقام کو سراہتے ہوئے اسے عالمِ اسلام کی جامع مرجع تنظیم قرار دیا۔ انہوں نے بالخصوص رابطہ کے اس اہم کردار کی تعریف کی جو اس نے اسلامی مذاہب کے درمیان پل قائم کرنے اور اسلاموفوبیا کے خدشات اور مہمات کا مؤثر مقابلہ کرنے میں ادا کیا ہے۔  یہ گفتگو اس موقع کے حوالے سے بھی تھی جب    عزت مآب سيكرٹری جنرل نے  15 مارچ کو  نیویارک میں اقوامِ متحدہ کی جنرل اسمبلی کے  اُس خصوصی اجلاس میں، جو اسلاموفوبیا کے عالمی دن کا پہلا باضابطہ اجلاس تھا، مسلم اقوام کی نمائندگی کرتے ہوئے خطاب کیا تھا۔

اپنی گفتگو میں عزت مآب سیکرٹری جنرل نے واضح کیا کہ رابطہ عالم اسلامی، مسلمانوں سے ہے اور مسلمانوں کے لیے ہے، اور وہ اپنی تمام تر صلاحیتیں انہی کی خدمت کے لیے وقف کیے ہوئے ہے۔ انہوں نے  بتايا کہ رابطہ، نبی کریم ﷺ  کی رحمتِ عامہ اور اخلاقِ عالیہ کے پیغام کو بنیاد بناتے ہوئے انسانیت کی خدمت اور عالمی امن و سماجی ہم آہنگی کے فروغ کو اپنا مرکزی مشن سمجھتی  ہے۔

ڈاکٹر العیسی نے رابطہ عالم اسلامی کے عالمی فلاحی و سماجی پروگراموں اور دنیا بھر سے موصول ہونے والی درخواستوں کے منظم جائزے کا بھی ذکر کیا، اور اس بات پر زور دیا کہ رابطہ ہمیشہ متعلقہ ممالک کے سرکاری اور قانونی تقاضوں کے مطابق ہی خدمات انجام دیتی ہے۔

اس موقع پر  انہوں نے  نے انڈونیشیا کے ماڈل کی بھی بھرپور تحسین کی، جو اپنے مختلف  سماجی اجزاء کے درمیان ہم آہنگی اور ایک قومی چھتری کے نیچے بقائے باہمی کی بہترین عملی مثال ہے۔ انہوں نے زور دیا کہ انڈونیشیا کا تجربہ مذہبی اور نسلی تنوع رکھنے والے دیگر ممالک کے لیے امن اور سماجی ہم آہنگی کے قیام میں ایک مضبوط حوالہ بن سکتا ہے۔