جنوب مشرقی ایشیا کی سب سے بڑی مسجد میں خطبۂ جمعہ ڈاکٹر العیسی نے جامع مسجد استقلال، جکارتہ میں نماز جمعہ کی امامت کی

جنوب مشرقی ایشیا کی سب سے بڑی مسجد میں خطبۂ جمعہ

ڈاکٹر العیسی نے جامع مسجد استقلال، جکارتہ میں نماز جمعہ کی امامت کی

جکارتہ:

رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے آج دارالحکومت جکارتہ میں واقع جنوب مشرقی ایشیا کی بڑی مساجد میں سے ایک، جامع مسجد استقلال میں  جمعہ کے اجتماع سے خطاب  اور نماز کی امامت فرمائی۔

اپنے خطبے میں ڈاکٹر العیسی نے اسلام کی عظیم اقدار اور ابدی اصولوں پر روشنی ڈالی، جنہوں نے تاریخ کے ہر دور میں معاشروں کی استقامت، اتحاد اور ترقی میں بنیادی کردار ادا کیا۔ انہوں نے مسلمانوں کو اس بات کی ترغیب دی کہ وہ اپنے قول و عمل میں اعلیٰ اسلامی کردار، حسنِ اخلاق، دلوں کو جوڑنے، اور مخلوقِ خدا کے ساتھ بھلائی کو اپنا شیوہ بنائیں۔اس دینِ رحمت کا پیغام وہی ہے جس کے ساتھ اللہ تعالیٰ نے ہمارے نبی مکرم ﷺ کو مبعوث فرمایا تاکہ وہ مكارمِ اخلاق کی تکمیل کریں اور انسانیت کے لیے رحمت بن کر آئیں۔

ڈاکٹر العیسی نے اپنی تقریر میں اسلاموفوبیا کے حوالے سے جاری منفی مہمات اور مسلمانوں کے خلاف بڑھتی ہوئی نفرت انگیزی کا بھی ذکر کیا، جس نے عالمی سطح پر شدید تشویش پیدا کر دی ہے۔ انہوں نے واضح کیا کہ یہ سلسلہ اس حد تک پہنچ چکا ہے کہ اقوام متحدہ کو "اسلاموفوبیا کے خلاف بین الاقوامی دن" منانے کا باضابطہ فیصلہ کرنا پڑا۔

خطبے میں مزید اجتہادی آراء، فقہی تنوع اور ہر ملک کے قومی انتظامی تقاضوں پر بھی گفتگو ہوئی۔ انہوں نے کہا کہ یہ امت مسلمہ کے لئے فکری اور علمی تنوع کا باعث ہے، اور اس کا تعلق ان مسائل سے مختلف ہے جو پوری امت کے مشترکہ مفاد سے جڑے ہوتے ہیں اور جن میں متحدہ اسلامی موقف کی ضرورت ہوتی ہے۔

اختتام پر ڈاکٹر العیسی نے رابطہ عالم اسلامی کی تاریخی کاوش، یعنی ” اسلامی مکاتبِ فکر کے درمیان پل قائم کرنے کا چارٹر“ کا حوالہ دیا، جو مکہ مکرمہ سے جاری ہوا اور جس میں دنیا بھر کے مختلف اسلامی مذاہب اور مسالک کے نمائندوں نے حصہ لیا۔انہوں نے کہا کہ یہ دستاویز اسلامی وحدت کی جدوجہد میں ایک اہم سنگِ میل ہے، اور امت کی راہنمائی کے لیے ایک روشن نقشۂ راہ ہے، جو کتاب اللہ اور سنت رسول ﷺ کی روشنی میں، متحدہ کلمہ اور مشترکہ عمل کے اصولوں پر قائم ہے۔ یہ اقدام درپیش چیلنجز سے نمٹنے اور امت کے اجتماعی خیر کو فروغ دینے کے لیے ایک مضبوط بنیاد فراہم کرتا ہے۔