وفاقی جمہوریہ نائجیریا کے صدر اور مسلح افواج کے سپریم کمانڈر، جناب بولا احمد تینوبو نے دارالحکومت ابوجا کے صدارتی محل میں سیکرٹری جنرل رابطہ، عزت مآب شیخ ڈاکٹر محمد العیسی کا استقبال کیا

وفاقی جمہوریہ نائجیریا کے صدر اور مسلح افواج کے سپریم کمانڈر، جناب بولا احمد تینوبو نے دارالحکومت ابوجا کے صدارتی محل میں سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد العیسی کا استقبال کیا۔

ملاقات کے دوران رابطہ عالم اسلامی کے پیغام اور اہداف سے متعلق متعدد امور پر تبادلۂ خیال ہوا۔

صدرِ محترم نے مغربی افریقہ میں سماجی امن کے فروغ کے لیے رابطہ عالم اسلامی کی پہل کو سراہتے ہوئے ’’اعلان ابوجا‘‘ کے لیے اپنی مکمل حمایت کا اعادہ کیا۔ اعلان میں عملی منصوبے، اس کے نفاذ کے پروگراموں اور مشترکہ تعاون کے لیے ایک رابطہ کمیٹی کی منظوری دی گئی ہے، تاکہ اس کے پروگراموں پر مقررہ ادوار میں ہونے والی پیش رفت کے جائزوں کی روشنی میں عمل درآمد یقینی بنایا جا سکے۔ یہ تمام اقدامات مغربی افریقہ کی مذہبی قیادتوں کے اعلان پر عمل درآمد کے عزم کے تحت کیے جائیں گے۔

ڈاکٹر العیسی نے دارالحکومت ابوجا میں رابطہ کے اس اقدام سے متعلق کانفرنس کی سرپرستی اور حمایت پر صدرِ محترم کا شکریہ ادا کیا۔ کانفرنس میں مغربی افریقہ کے مختلف مکاتبِ فکر سے تعلق رکھنے والی اسلامی ومسیحی مذہبی قیادتوں نے شرکت کی، جبکہ اسلامی تعاون تنظیم، تنظیم کی یونین آف نیوز ایجنسیز، اسلامی تعاون تنظیم اور رابطہ عالم اسلامی کی فقہی اکیڈمیوں، امریکہ سے ممتاز انجیلی مسیحی قیادتوں، ویٹیکن کے نمائندوں اور مختلف پروٹسٹنٹ کلیساؤں کے نمائندوں نے بھی معاون شراکت داروں کے طور پر شرکت کی۔