رابطہ عالم اسلامی کے سیکرٹری جنرل کی نائیجیریا میں مسلم ومسیحی قیادتوں کے گول میز اجلاس میں شرکت، معاہدوں پر دستخط

مغربی افریقہ میں سماجی امن کے لیے رابطہ عالم اسلامی کے اقدام سے وابستگی اور” اعلانِ ابوجا“ میں طے شدہ فیصلوں کے تسلسل میں:

رابطہ عالم اسلامی کے سیکرٹری جنرل کی نائیجیریا میں مسلم ومسیحی قیادتوں کے گول میز اجلاس میں شرکت، معاہدوں پر دستخط

ابوجا:
مغربی افریقہ میں سماجی امن کے لیے رابطہ عالم اسلامی کے اقدام اور اس کی کانفرنس کے نتیجے میں جاری ہونے والے”اعلانِ ابوجا“میں طے شدہ فیصلوں پر عمل درآمد کے سلسلے میں، جسے خطے کے تمام مذاہب اور مکاتبِ فکر کی نمائندہ مذہبی قیادتوں نے متفقہ طور پر منظور کیا تھا اور جسے وفاقی جمہوریہ نائیجیریا کے صدر بولا احمد تینوبو کی سرپرستی حاصل تھی، رابطہ عالم اسلامی کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے خطے کی مسلم ومسیحی قیادتوں کے اعلیٰ سطحی گول میز اجلاس میں شرکت کی۔ ” سماجی ہم آہنگی کے فروغ میں مذہب کا کردار“کے موضوع پر منعقدہ اس اجلاس کا مقصد تنازعات کی روک تھام، نیز مذہبی ونسلی تنوع پر مشتمل قومی سماجی ڈھانچے کے تحفظ کے شعبوں میں مشترکہ کاوشوں کو مزید مضبوط بنانا تھا۔

اجلاس کے نتیجے میں ابتدائی طور پر متعدد مفاہمتی یادداشتوں پر دستخط کیے گئے، جن میں رابطہ عالم اسلامی اور نائجیریا کے بین المذاہب ثالثی مرکز کے درمیان مفاہمتی یادداشت، نائجیریا کی جماعتِ ازالہ بدعت واقامتِ سنت اور شمالی نائجیریا کی مسیحی مذہبی قیادت کونسل کے درمیان مفاہمتی یادداشت، نائجیریا کی جماعت نصر الاسلام اور اور امن وترقی کے لیے مسیحی نوجوانوں کے اقدام کے درمیان مفاہمتی یادداشت، اور نائجیریا کی اہلِ سنت تنظیموں کی فیڈریشن اور ترقی پسند پادریوں کی یونین کے درمیان مفاہمتی یادداشت شامل ہیں۔

مغربی افریقہ میں مذہبی و سول قیادتوں اور اداروں کی رابطہ کمیٹی دستخط شدہ مفاہمتی یادداشتوں پر عمل درآمد کے ساتھ ساتھ ”اعلانِ ابوجا“میں شامل رابطہ عالم اسلامی کے سماجی امن کے اقدام سے متعلق تمام ذمہ داریوں کی نگرانی کرے گی، تاکہ ان پر مؤثر طریقے سے عمل درآمد، مقررہ اہداف کا حصول اور پیش رفت کی باقاعدہ ودرست پیمائش یقینی بنائی جا سکے۔