”فورین پالیسی“ میگزین کی جانب سے سیکرٹری جنرل رابطہ عالم اسلامی کی میزبانی

”فورین پالیسی“  میگزین کی جانب سے سیکرٹری جنرل رابطہ عالم اسلامی کی میزبانی

واشنگٹن: 
امریکی دارالحکومت  واشنگٹن  میں ”فورین پالیسی“  میگزین نے سیکرٹری جنرل رابطہ عالم اسلامی اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسیٰ کے اعزاز میں ایک مشاورتی نشست کا اہتمام کیا، جس میں ادارتی حکام، چیف ایگزیکٹو اور پبلشر سمیت ممتاز مذہبی، فکری، صحافتی اور سیاسی شخصیات نے شرکت کی۔

نشست میں متعدد اہم مسائل، بالخصوص مذہبی اور فکری امور پر تفصیلی تبادلہ خیال کیاگیا۔

عزت مآب نے پوچھے گئے سوالات کے جوابات دیتے ہوئے ”میثاقِ مکہ مکرمہ“کے مندرجات اور اس کی امتیازی خصوصیات پر روشنی ڈالی۔ شرکاء نے میثاق کے تصور اور اس کے مواد کی بھرپور تحسین کی، جو اسلامی فکر کی وسعت، ہمارے دینِ حنیف کی رواداری، بقائے باہمی کی اقدار اور عصرِ حاضر کے مسائل کے حل کی بہترین ترجمانی کرتا ہے۔

واضح رہے کہ یہ میثاق دورِ حاضر کی اہم ترین دینی دستاویزات میں سے ایک ہے، جس پر 1200 سے زائد علمائے کرام ومفتیانِ عظام نے دستخط کیے ہیں، جبکہ اس کی افتتاحی کانفرنس میں 4500 سے زائد اسلامی مفکرین شریک ہوئے تھے۔ اسلامی تعاون تنظیم (OIC) نے بھی اس کی منظوری دیتے ہوئے اسے رکن ممالک کے دینی،تعلیمی اور ثقافتی اداروں میں بطور ماخذ استعمال کرنے کی سفارش کی ہے۔ تنظیم ہی کی اس سفارش پر عمل درآمد کرتے ہوئے، اس وقت دنیا بھر میں ائمہ کرام کو اس میثاق کے مندرجات پر خصوصی تربیت فراہم کی جا رہی ہے۔

ملاقات کے دوران رابطہ عالم اسلامی کے مشن اور اہداف کی روشنی میں عالمی سطح پر درپیش مختلف عصری مسائل پر بھی گفتگو کی گئی۔